隔牆有耳：愛國洗腦片 港列兒童不宜
[轉載/Youtube] 中共史詩式電影《建黨偉業》喺內地遍地開花，連幼稚園都要包場帶學生去睇戲，三歲細路都要認識中共黨史，咁先係合乎國情嘅國民教育。點知香港個影視處卻不識好歹，竟然將呢套戲評為IIA級，即係兒童不宜，影視處評審標準違反國情，剝奪香港新一代學習流血革命嘅基本人權，八方要問一句：影視處官員該當何罪？ 話危險動作唔夠含蓄
套戲已經將湯唯戲份剪晒，仲兒童不宜？影視處向八方解釋時竟然辯稱，《建黨偉業》有暗殺、中槍濺血、士兵被炮火炸傷嘅「暴力場面」，而根據影視處嘅指引，呢啲場面屬於「有限度暴力」，因此將套戲評為IIA級；而電影中有「使用容易得到的武器進行容易模仿」嘅危險動作，《建黨偉業》表達得太「主動」唔夠含蓄，因此套戲兒童不宜。
豈有此理！呢啲暗殺、中槍、暴力場面，都係一黨專政嘅中共輝煌歷史，特區小小一個影視處，官僚以為將所謂「指引」做擋箭牌就可以甩身，八方相信冇咁易。《建黨偉業》內地老少咸宜，戲中有兩場暗殺戲同一場戰爭場面，分別係張震飾演嘅「殺手甲」暗殺光復會陶成章，另外就係張涵予飾演嘅宋教仁喺火車站被暗殺，戰爭戲就講劉德華飾演嘅蔡鍔起兵反對袁世凱稱帝。
知情人士向八方透露，影視處曾經與片商講數，只要Trailer剪咗張涵予被人暗殺嘅片段，就可以評為I級，即係可在公眾地方播放，II級片只可喺戲院播。先睹為快嘅導演張同祖認為評做IIA級合理，「反而我會着眼睇番當時共產黨嘅理想同今日共產黨比較」。
《建黨偉業》導演韓三平矢言票房最少8億元，至今喺內地上映咗六日，票房已經有1.5億元，八方覺得冇水份，因為好多官家機構包場，多幾個億都唔係難事，打破《建國大業》4.1億元票房紀錄指日可待，至於香港票房如何，八方估計與港人愛黨指數成正比。
內地網民都議論紛紛
內地網民對影視處評級議論紛紛，指反映內地兒童心理素質強過港孩，顯然已經做好準備，長大之後承受國家對人民嘅「感情傷害」。革命不是請客食飯，八方呼籲全港中小學幼稚園老師集體公民抗命，帶團入戲院包場上國民教育課，否則日後起義革命，邊處有人！
0 comments:
Post a Comment