[娛樂] 囡囡三點式賀陳琪生日

囡囡三點式賀陳琪生日(2011-05-21)


[轉載/Youtube] 胡諾言賀妻生日　B女水着贈興

胡諾言最錫老婆陳琪同囡囡胡芷苓，一家三口日前去咗香港迪士尼樂園玩，入住酒店期間，小芷苓仲換上三點式泳衣嬉水，小小o靚模大擺甫士，可愛到極。

陳琪呷囡囡醋
小芷苓曾見過媽咪陳琪着三點式，佢又有樣學樣，喺泳池嬉水嘅佢笑到見牙唔見眼，陳琪噚日接受電話訪問時話：「BB（胡芷苓暱稱）係全城身材最差嘅o靚模，佢有肚腩仔。」20個月大嘅小芷苓已經有30磅，着到3歲嘅衫仔，陳琪話：「BB幾靚女o架，家有個法國童裝贊助衫仔畀佢。BB比同齡小朋友強壯啲，唔想佢變肥妹仔。」
陳琪下周四37歲生日，胡諾言預早為老婆製造驚喜，佢哋book咗食自助餐，侍應送上蛋糕，卡通人物又走埋嚟贈興，陳琪同小芷苓兩母女開心到笑不攏嘴，陳琪話：「老公個女開心咋。」言語間似呷囡囡醋？陳琪話：「唔會嬲，老公梗係錫個女多過我，唔到我呷醋。」陳琪希望正日生日時，老公仲會有額外驚喜同陸續有嚟嘅生日禮物。
三口之家仲會唔會追個囝囝添家庭成員？陳琪話：「順其自然。」小芷苓家一周返5日playgroup，呢次入樂園玩都要做逃學威龍，不過佢哋一早同學校請咗假，攞正牌去玩。