[娛樂] 撞車壞機 楊千嬅困福建

趕巡迴遇交通事故　千嬅困福州「真係慘」 2011-05-23


[轉載/Youtube] 撞車壞機　千嬅困福建
楊千嬅為咗宣傳佢張國語大碟真係好落力喺內地搞巡迴簽售會，大前日（周五）完成福建省莆田簽售會後，前日一早未夠6點就出發去機場，準備飛去江西省南昌繼續做簽售會， 點知喺高速公路遇到嚴重交通意外，搞到成條高速公路要封閉，千嬅雖然已經兜第二條路走，但始終都係趕唔上8點15分嗰班飛機，只好改搭晏晝機。

簽售會改期
黑開有條路嘅千嬅到機場後，發現下晝飛嗰班機又話因為架機要緊急維修，再加上航機要喺重慶飛過嚟，但重慶嗰邊又因惡劣天氣一直未批准起飛，結果千嬅同助手等人一直滯留福州長樂機場超過十個鐘，馮仁昭噚日打畀千嬅，佢話：「噚日真係好慘，喺機場滯留咗10幾粒鐘，最終都係要先飛去上海再駁機去南昌，結果凌晨1點幾先到南昌，簽售會就改咗今日（22日）11點做，做完又要趕去江蘇省淮安市做第9站簽售會，真係好攰！」