[轉載/Youtube] 婷婷力阻栢芝帶Lucas逃學 張栢芝早前在空中與舊愛陳冠希釋前嫌，還熱情自拍合照留念，有傳因而激嬲老公謝霆鋒，夫妻爆發冷戰，前日霆鋒身處大馬拍戲，栢芝就湊快將4歲的大仔Lucas去台北過生日。不過霆鋒細妹謝婷婷昨就質疑姪仔做逃學威龍，揚言細路返學很重要，似語帶雙關暗寸栢芝。
張栢芝本月8日母親節當天由台北乘機返港，先後於候機室和商務艙遇上舊愛陳冠希，栢芝主動打招呼又玩自拍，其熱情舉動令老公謝霆鋒嬲到震。前日栢芝31歲生日，霆鋒仍在大馬為新片《逆戰》趕戲，結果栢芝湊埋大仔Lucas去台北會徐熙媛（大S）等好友。今年8月便4歲的Lucas正讀K1，但不時做逃學威龍隨母親四圍飛，難怪姑姐謝婷婷昨日在尖沙嘴行catwalk時，也苦口婆心勸喻姪仔應返學。
「唔知有冇返學」
婷婷早前曾指奇怪每次見到Lucas都是小朋友上學時間，已好奇他為何不用返學。對於栢芝前日又帶Lucas去台北，婷婷昨日再說：「我真係唔係好清楚，唔知佢有冇返學，但好多時平日中午我都會喺媽咪屋企見到佢，唔知佢係咪放咗學。」
問到婷婷可覺Lucas這個年齡返學好重要，她說：「返學梗係好重要，小朋友會知幾點起身、返學時間表、秩序、點同人相處，如果到5、6歲先學會抗拒。Lucas都好乖好易同人溝通，好識同人分享。我帶佢出去，有時見到其他小朋友嗌交，佢會叫人calm down，佢仲好錫細佬。」
霆鋒一臉落寞
問婷婷有否送生日禮物給栢芝？她稱只託人向阿嫂送上生日祝福：「屋企人之間唔興送禮物，平日啱用先買畀對方。」
婷婷又爆男友安志杰常陪霆鋒打機，但不覺霆鋒有異，她說：「我聽到男友同阿哥喺屋企打online game同埋skype，仲聽到阿哥嘻嘻哈哈，佢由攞影帝到家都好開心，平時阿哥好似食咗花生醬（乸口乸面），家成個人好活潑。」
不過實情又未必如婷婷所說的樂觀，本周一有大馬粉絲探霆鋒班後將照片放上微博，着制服的霆鋒一臉落寞心事重重，網友還形容他「好憂鬱」、「他今天真的很不開心」。
0 comments:
Post a Comment