28may2011-民陣推出仿清明上河圖-71上街圖
[轉載/Youtube] 民陣今年推出巨作《七一上街圖》，仿效《清明上河圖》宣傳今年7.1大遊行，八方噚日刊登咗上卷，點知一早就俾人call爆，人人都問點解幅上街圖得一半，有個教授質問八方：「睇唔到完整一幅，點夠喉！」八方知道大家都曾7.1上街，都想喺上街圖入面搵吓有乜新發現，OK，既然如此，八方一於徇眾要求，今日足本刊登《七一上街圖》，滿足大家好奇心，等大家細心欣賞，順便可以Tag返自己。7.1遊行有破紀錄超過50萬人上街，因此好多社運人物都係畫中人，近年社運新勢力自然唔少得。
有民主小女神周澄
喺正義道附近，畫咗一班學聯成員，中間揮手個女仔，原來係「民主小女神周澄」，似唔似？見仁見智。相距不遠見到FM101梁穎禮，仲有一班推住個大型草泥馬上街嘅藝術公民成員。附近夏愨道，見到有位四眼哥哥着住艾未未頭像紅衣，佢就係幫手設計AWW Tee嘅網民野仁。
行到中環，上街圖上重現消失了的皇后同天星碼頭。菜園村朋友、高登網民都有現身，仲有幾個令大家沒齒難忘嘅人物，大家搵到未？民陣召集人范國威話初版3,000份《七一上街圖》售價「廿蚊張」，如果六四當日在維園沽清，會考慮加料出V2.0，畫警察鎮壓示威、80後反高鐵三步一跪拜、韓農跳海等，全面記載庶民抗爭歷史場面。
古有《清明上河圖》描繪北宋嘅繁華景象；今有《七一上街圖》，記錄香港嘅民運盛世。六四快來了， 7.1還會遠嗎？民間人權陣線為宣傳今年 7.1大遊行，最近搵咗插畫師嘔心瀝血，繪製咗一幅 80cm長嘅《七一上街圖》，紀錄歷年 7.1上街嘅團體、人物同小故事。
3月開始構思
《七一上街圖》由銅鑼灣維園畫到去中環 CGO、禮賓府，沿途收錄咗 500位市民、政治人物面貌，大家可以慢慢細心欣賞，喺裏面搵吓見唔見到自己。維園草地見到華叔坐住輪椅堅持平反六四，陳日君樞機主持祈禱會，《城市論壇》開壇、環保觸覺反對屏風樓。告士打道出口有長毛、陶君行高呼「沒有抗爭哪有改變」，前少少有白鴿黨仁哥、阿涂、張文光等人，美中不足係畫中嘅卿姐冇向群眾揮手。白鴿黨前係選民力量，重有人民力量高舉「票債票償」標語，唔知有乜玄機。
去到灣仔馬師道附近，見到《蘋果》老闆肥佬黎同民主之父馬丁結伴上街，行前少少見到陳四萬熱情揮手。塗鴉少女都有現身撐艾未未。民陣召集人范國威話，《七一上街圖》喺 3月開始構思，希望用新形式吸引多啲人參加遊行。呢幅大製作民陣有售， 20蚊一張，用作支持民陣經費。
0 comments:
Post a Comment