生完即晚餵人奶 陳倩揚誕7.3磅B仔難忘十級痛
[轉載/Youtube] 08年港姐亞軍陳倩揚上周六（11日）順產誕下7.3磅男嬰，由於堅持自然分娩，因此她產前經歷近40小時陣痛和分娩時的十級痛楚，令她一生難忘。陳倩揚甚至痛到大叫：「我唔得啦！」認真大吉利是，幸好老公一直陪伴在側打氣，最後母子平安。陳倩揚囝囝上周六終於和大家見面，雖然她在產前已有心理準備迎接陣痛和分娩時的十級痛楚，加上陳倩揚一向自問忍得痛兼捱得，不過產後回想起前後約40小時的陣痛和十級痛的過程，她直言會銘記於心，幸好陳倩揚得到家人及老公陳浩然一直在旁支持和打氣，終順利誕下囝囝。
痛到嗌我唔得啦
回想起入到產房的一分一秒，陳倩揚感謝老公及醫生和出色的助產士一直在旁打氣和幫忙，她笑說：「喺我幾乎真係冇力之際，幫我跨過一個一個嘅難關，令我終於可以用盡畢生最大嘅氣力生囝囝出嚟。當時我喺產房唯一可以講嘅說話就係『我唔得啦』，好彩最後我同囝囝都平安。」
長長眼線似媽咪
生完囝囝，陳倩揚精神不錯，未有太過疲倦，當晚已可落床及嘗試餵人奶。而陳倩揚的媽媽、奶奶和契媽一早已為她準備了大量的坐月膳食，老公亦一早安排好手頭上工作，並已請假在家全天候陪老婆坐月。至於囝囝的樣貌，陳倩揚表示：「我覺得佢嘅眼眉同個鼻似爸爸，長長嘅眼線同對眼就似我。至於囝囝個名，會由長輩決定，我最希望係囝囝身體健康，大個後做一個有責任心同快樂嘅人。」
0 comments:
Post a Comment