[時事] 卓越新聞獎《蘋果》大豐收

蘋果 7獎疊起高過人　動新聞夠真 - 2011-06-09 -
隔牆有耳：卓越新聞獎《蘋果》大豐收


[轉載/Youtube] 恭喜！恭喜！八方今日要報喜，因為《蘋果》喺今年亞洲出版業協會年度卓越新聞獎大豐收，香港、台灣《蘋果日報》連同動新聞及漫畫家尊子，連掃七個獎成大贏家。

動新聞奪多媒體大獎
頒獎禮噚晚舉行，以創新方式報道新聞嘅蘋果動新聞先拔頭籌，以去年土瓜灣塌唐樓慘劇嘅動畫奪得多媒體新聞獎大獎，可見動畫已經成為獨當一面嘅報道新聞方式。噚晚大會播出得獎動畫短片時，全場人睇到眼定定，而其他獲呢個獎嘅都係國際級傳媒機構，蘋果動新聞榜上有名，直情係為港爭光。
劉曉波獲得諾貝爾和平獎，《蘋果》報道呢單全球大事亦取得人權報道大獎；八方同事遠赴挪威採訪頒獎儀式，可惜得主不能現身，更遺憾嘅係劉曉波仍未獲自由。香港人與核為鄰，《蘋果》報道大亞灣隱瞞核事故，今年日本爆發核洩漏危機，令大家反思核電安全問題。
八方鄰居尊子係 SOPA常客，《選票起義》漫畫一針見血，呼籲市民表態；攝影組同事拍攝反高鐵、撐菜園村嘅一組相片，反映 80後參與社運嘅理想，對抗當權者嘅熱血，家睇番，八方都覺得好感動。台灣《蘋果日報》今年都得到兩個獎，八方要恭喜佢哋，同埋所有得獎、參賽行家，希望大家繼續努力，堅守崗位報道真相。