隔牆有耳：旅遊大使麥兜勁 - 李八方
[轉載/Youtube] 要搵個香港大使，成龍、劉華太悶，曾蔭權不代表我，八方第一個反對，好在我哋仲有一個可以代表到香港人嘅旅遊大使，就係土生土長嘅麥兜。為防自由行旅客流失台灣，旅發局最近派麥兜到內地及台灣做親善大使，東方之豬推介東方之珠，真正一豬兩味。 麥兜母子蠟像下月現身
咪睇麥兜個樣懵吓懵吓，原來佢喺內地撈得好掂，全因電影《麥兜響噹噹》令內地同胞好冧，而且搵麥兜做代言人，唔使擔心好似啲藝人咁傳緋聞或吸毒，麥兜仲紅到上山頂，將躋身杜莎夫人蠟像館，同李小龍、瑪麗蓮夢露等放埋一齊。該館總經理麥婉嫻透露，麥太、麥兜母子蠟像7月20日現身蠟像館，仲會配合麥家碧創作，佈置成茶餐廳，兩母子坐喺卡位食蛋撻等地道小吃，遊客可以搭枱合照㖭。
杜莎主要為真人造像，今次係首次為香港卡通人物整蠟像，「我哋要問麥家碧究竟麥兜幾高，原來麥兜3呎高，麥太就3呎10吋，又要照麥兜右眼胎記嚟做。」製作過程與一般名人明星差唔多，21個雕塑師及工作人員花咗三個多月，先仔細量度麥兜頭部及全身共500多個位置尺寸，「麥兜最方便係唔使搵衫畀佢着，又唔使植入假髮，因為畫落去就得。」
麥兜仲會到內地宣傳，內地著名兒童節目主持人，即係「男版譚玉英」楊益哥哥，會教細路做「麥兜操」，旅發局大中華區域總監葉貞德話，啲細路日日都照住嚟做體操o架，「搵麥兜喺內地宣傳香港，吸引到細路，即係吸引埋啲父母，內地小朋友話晒事o架。」
麥兜喺台灣雖然冇咁出名，但旅發局4月帶佢去當地旅遊展，即刻成為風頭躉，所以決定同台灣兒童電視台合作，每日三、四次播放「麥兜操」，又喺幼兒園搞麥兜彩繪比賽，圖畫就係香港景點。相信一輪密集宣傳後，兩岸小朋友睇怕發夢都會見到麥兜。
旅發局旅遊產品推廣主管黃卓雄話，麥兜上年起做旅遊大使，今年加大宣傳費至350萬元，主要針對家庭及年輕人市場，佢話雖然內地自由行可到台灣，但暫時開放省分不多，且內地市場龐大，本港仍具吸引力，料今年6月至8月仍會有逾1,000萬旅客，較去年升8%，當中逾八成係內地及台灣客。
0 comments:
Post a Comment