「再鬧霆鋒就一鋪清袋」 白姐姐斥栢芝冇內涵
【鋒芝變之自毀長城】鋒芝離婚已成定局，栢芝前日發炮數臭霆鋒不是好男人，卻聰明地全程迴避機艙合照事件是兩人婚變的導火線，擺明將責任推卸落霆鋒身上，就連睇住霆鋒大的白韻琴也看不過眼，力斥栢芝恃靚任性，並說：「離婚係好事，栢芝即刻收聲止蝕，再鬧霆鋒就一鋪清袋，每鬧一句就等如喺自己面上捅一刀，流血不止。」現年31歲的張栢芝與謝霆鋒結婚5年，自上月8日栢芝被本報獨家踢爆在機艙主動與陳冠希和好影合照後，鋒芝關係急轉直下，個多月來兩邊陣營都派出知情人士爆料，先由拉姑好友查小欣發功，爆出鋒芝婚變內幕，栢芝被揭狂轉移霆鋒過億資產，不過栢芝深知機艙合照事件辣㷫老公，無奈努力箍煲失敗，離婚已成為定局，栢芝為爭兩子撫養權，惟有作出絕地反擊。
「雙方離婚係好事」
「失蹤」多時的栢芝日前先巧合地在一號風球吹襲下自編自導自演親子騷，前日又藉好友、助手、經理人在微博發功鬧爆霆鋒，栢芝更主動出擊接受傳媒訪問揭霆鋒真面目，數臭霆鋒不是好男人、好爸爸，又指霆鋒放料令她不齒，但全程迴避機艙合照是兩人鬧婚變的導火線，擺明將責任推卸落霆鋒身上。
曾經相愛的鋒芝到現在演變成女方的痛罵，栢芝公開數臭老公令不少人看不過眼，力挽形象卻換來千夫所指，看着霆鋒大的白韻琴也看不過栢芝的行為，昨日接受電話訪問時極力維護霆鋒，力斥栢芝恃靚任性。
「再數會流血不止」
白姐姐坦言兩人結婚一直不被看好，她說：「好多時仔女都係行父母相同嘅路，雙方都嚟自破碎家庭，好矛盾地會走相同嘅路。佢太後生，唔識珍惜呢段感情，我對兩個小朋友唔擔心，有拉姑照顧。我深信霆鋒嘅傷痛會深過栢芝好多，內心好傷，有啲原罪（指淫照事件）係唔可以再找出來揚，雙方離婚係好事，好過細路見到父母明爭暗鬥，反正佢哋唔可以白頭偕老，早啲離婚大家唔使咁辛苦，栢芝唔好將細路哥拉落水，畀嫲嫲照顧會好好多。」
對於栢芝狂數霆鋒為人虛假，白姐姐力挺霆鋒不是一個會做戲的人，只是性格比較自我，她說：「栢芝外表有100分，但內涵就相差好遠，夫妻絕交不出惡言，對小朋友都唔好，我為霆鋒難過，佢好創傷，栢芝鬧霆鋒多一句就扣多啲分，會影響佢影藝事業，如果靜靜地離婚，栢芝仲有好多前途，我希望栢芝即刻收聲止蝕，再鬧霆鋒就一鋪清袋，一句半句都冇好處，尤其是對佢小朋友，就算霆鋒有千萬不是，唔好再數霆鋒，每鬧一句就等如喺自己面上捅一刀，係會流血不止。」
頻失場片商卻步
雖然栢芝急急發功力，不過她之前的不專業態度，聲稱生病甩底四川演出，拍《楊門女將之軍令如山》時失場兼不宣傳等，已令不少片商卻步，拍畢《河東獅吼2》後暫無片約，原本林建岳有意簽她做旗下也打退堂鼓，而栢芝主演的《無價之寶》將於8月上映，深信票房必受到衝擊。
0 comments:
Post a Comment