[時事] 國泰空姐 空中少爺 新制服登場

國泰黑貴婦　兩衩飄飄吓 2011-06-23
隔牆有耳：國泰空姐變黑貴婦 - 李八方


[轉載/Youtube] 國泰空姐7月8日新制服登場，呢次係國泰60年嚟第10次換新制服，又係久休復出時裝大師劉培基傑作。其實話新都唔算好新，因為保留咗經典設計，好似企領、「魚翅」logo同紅色等，一般搭客未必覺得好大分別，劉培基則話其實今次算破格，因為大膽加入唔少黑色。

經典設計獲保留
國泰以紅、綠色為記，以往確係少用黑色。劉培基解釋：「黑色好靚，一個女仔只要着條剪裁合適嘅黑裙，已經好靚。」另一突破係添加黑底繡金色圖案披肩，好有貴婦feel，呢條披肩係身份象徵，頭等商務艙嘅高級空姐至可以披。
深入民心嘅制服經典設計大部份獲保留，劉培基話：「一望就知係國泰空姐，仲有一定要用玫瑰紅，浪漫嘛。」空姐唔易做，為方便工作，裙後面有兩個衩，劉培基話只係實用需要，所以唔會開得好高。
新制服已經俾全球700位國泰員工試着，劉培基話因應員工意見，改過20個地方，「乘客覺得靚之餘，都係想方便佢哋工作。」空中少爺制服亦有新意，用咗唔少深淺不一嘅橄欖色，睇嚟新潮啲，冇咁老餅。國泰現有制服亦係出自劉培基手筆，99年換上，佢透露國泰兩年前搵佢再設計，佢因為已經退休推咗，「後來佢哋又嚟搵我，好難再推」。呢款新制服最少着10年，相信又成經典。
明年底前國泰有49架機換全新商務艙，2019年前又會新增90架新機，大地震後日本線客量暫未夠七成，但相信好快回復正常。

企領、紅色裙等設計，係國泰制服經典特色。

新制服有繡金披肩，高級空姐先有得披。