[娛樂] 與陳偉霆同場失魂 楊千嬅：心情唔好

底模圍偉霆　千嬅冇心情


陳偉霆樂意為阿Sa買內衣


[轉載/Youtube] 楊千嬅前晚喺九龍灣出席內衣品牌Triumph時裝騷，咁蹺同場另一嘉賓就係陳偉霆（William），William現任女友係千嬅舊愛鄭中基嘅前妻阿Sa，關係複雜兼尷尬。前晚陳偉霆喺一班性感內衣模特兒中又唱又跳，然後輪到千嬅上台，不過唔知係咪佢見到William同場，表演時不在狀態，仲有少少走音。公關就指千嬅話「心情唔好」，唔做訪問兼唔喺backdrop影相，但千嬅噚日就否認自己心情差，仲話係公關冇安排佢做訪問。

William尷尬
陳偉霆就話佢喺台上同內衣女模共舞都有啲尷尬，仲話：「唔會唔敢望，一定要有互動，搭吓膊咁。」問佢係咪好了解阿Sa嘅身材尺寸，佢聽完有啲怕羞話：「大約都知，佢成日keep弗，無話肥瘦。」
至於阿Sa之前就喺微博自爆病咗話：「處於中暑狀態的我……軀殼是呆呆的。」不過前日阿Sa同容祖兒、阿嬌齊齊去咗清遠為一個度假村開幕做嘉賓，仲自拍放上微博大晒姊妹情；相信阿Sa應該病好嘞，同場仲有范冰冰同熊黛林。