HKU SPACE出位課程 隔牆有耳：性愛真人TALK - 李八方
[轉載/Youtube] 香港人對性一向都好忌諱，敢做又唔敢講，為造福蒼生，最高學府取諸社會、用諸社會，八方發現港大專業進修學院（HKU SPACE）準備開辦名為「姿情識性」增進性健康關係工作坊嘅課程，開宗明義教授性技巧、性樂趣。有性治療師分享
呢類工作坊好多社福機構都搞過，大專院校可能係第一次。課程簡介話，課程會透過講者嘅專業知識同個案經驗分享，「協助參加者探索一些未知的空間，教授正確的性知識和價值觀，從而增進個人及伴侶的性健康與親密關係」。課程主題包括性態度、性生理、性技巧、性禁忌同多元性趣。
課程導師係註冊社工林依玲，來頭不平凡，係關注婦女性暴力協會嘅倡議幹事，之前係性工作者組織「紫藤」幹事，為「姐姐仔」發聲，由佢開壇，資歷毋庸置疑；佢同八講，希望透過工作坊，提供一個正面嘅平台畀大家分享同討論性，不論男女，只要年滿18歲，想改善性健康同關係嘅人都應該報名。
紫藤以前都搞過類似工作坊，由經驗豐富「姐姐仔」主講，林依玲話佢上堂都唔會齋講，會視乎學生背景，度身訂做講學材料，仲會請性治療師即場分享，理論與實用並重。
學費每位780蚊
課程10月20日開班，六節共12小時，學費每位780蚊。學海無涯，香港人確係有需要惡補性知識，HKU SPACE近年亦開辦唔少出位課程，年初有個探討日本AV文化嘅「日本性風俗文化」課程，由於引起教育界爭議，據講學院高層縮沙，最後開班不成，遺憾。
姿情識性工作坊課程主題
•認識性生理
•學習性技巧
•探討性禁忌
•發掘性樂趣
•完美性生活
資料來源：HKU SPACE
0 comments:
Post a Comment