任亮憲重出江湖 聲震《城市論壇》 2011-05-22
[轉載/Youtube] 曾涉嫌強姦及非禮案的人民力量成員任亮憲，早前不予警方起訴。任亮憲表示，日後言行會更謹慎，立場亦會更堅定，他又指，事情已經過去，不會再作評論，而事情已有裁決，會尊重本港司法制度。任亮憲又指未決定是否參選本年區議員選舉。「維園阿哥」任亮憲強姦疑案甩身，蟄伏五個月，噚日回歸《城市論壇》繼續鬧爆民建聯。佢老竇、前立法局議員任善寧寄語寶貝仔「要吸取教訓」。
噚日《城市論壇》講立法會議席替補安排，集齊黃毓民、梁家傑、劉江華等猛人，加埋任亮憲，搞到個場好㷫，連放緊大假嘅謝志峰都喺台下捧場。
講自己嘢被主持打斷
任亮憲一改「紅衫仔」形象，着件藍白格仔恤衫登場，發言嘅時候忽然玩感性講自己嘢。佢話：「闊別《城市論壇》五個月去處理私人事務，事情得到圓滿解決……」頂更主持人李小薇忍唔住打斷任亮憲，叫佢入正題。
任亮憲即刻回魂青筋暴現。劉江華話啟動公投純屬「玩嘢」，令維園阿哥非常谷氣。佢狂轟政府建議第二高票候選人替補係違反《基本法》賦予嘅投票權：「本來好開心好愉快咁嚟《城市論壇》，點知聽到民建聯劉江華歪理滿腔指鹿為馬……我要海鮮，你係咪畀鹹魚我就得呢？點解你覺得爭取雙普選係玩嘢？」
維園阿伯唔執輸，行埋去想同任亮憲辯論，俾保安隔開，後面班人民力量成員歡呼造勢，仲有fans舉牌：「任亮憲回魂，民建聯頭痕」，正反陣營互相指罵，成個場七國咁亂，小薇頻頻滴汗。
拒答如何對待女粉絲
事後八方問任亮憲有乜說話想同兩位受害人講，佢答：「說話就冇乜，事件已經過去，大家輕裝上路，相信大家經歷過一段艱難嘅時期。以後任亮憲會係更盡責、完美、識得處理嘅人。」當有人問「會唔會同女fans保持距離」，佢冇答就行咗去。佢老友星屑醫生話任亮憲「區選應該走唔甩」，遲啲會搞訓練營密集式特訓。
任善寧着住人民力量T恤，首次現身維園力撐寶貝仔。佢話唔驚俾人舊事重提，「啱啱有朋友都話，如果選舉論壇有人拎呢啲嘢嚟講點呢？我話咁即係證明對方冇論述囉」。
[時事] 城市論壇 2011-05-22 替補議席問題
0 comments:
Post a Comment