[轉載/Youtube] 著名經理人陳自強前晚舉行70歲大壽生日派對，圈中人緣甚廣的他請來過百好友出席，當中包括曾是他旗下藝人的鍾楚紅和張曼玉等。近日被傳患大腸癌的李琳琳也有畀面出席，素顏出現精神飽滿的她，中氣十足感謝眾人關心。曾是成龍、張曼玉（Maggie）、張學友及吳彥祖的經理人的陳自強（Willie），前晚在尖沙嘴舉行70歲大壽生日派對，派對場外擺放一張巨型生日卡及「70」字形氣球，氣氛十足。雖然不時下大雨，但無損陳自強的心情，出席賓客眾多，包括白雪仙、鍾楚紅、張曼玉、狄波拉和老公鬍鬚Kong、李琳琳和姜大偉、林建岳、楊受成和太太陸小曼、麥浚龍、何超儀及陳子聰、鄺美雲、向華強及向太等等，星光熠熠。
狄波拉不談栢芝
近日傳患大腸癌的李琳琳素顏和老公姜大偉到場，她戴上眼鏡精神相當不錯，甫見記者影相即面露笑容，記者要求她接受訪問，起初李琳琳只是笑而不答，但當記者再追問多幾次，李琳琳即中氣十足地說：「多謝大家關心，今晚主角係Willie呀，多謝大家。」說畢便進入派對內，始終未有接受訪問。
另方面，日前張栢芝被踢爆在飛機上主動跟陳冠希合照，兩人一解多年來的恩仇，身為奶奶的拉姑甫出現當然成為焦點，但她只是在場外跟壽星公合照完後便極速拖老公入場，對提問一概未有回應。
曼玉聽話少買衫
張曼玉和鍾楚紅也畀面出席，兩人先後到場，紅姑穿上藍色斜膊裙，充滿夏日氣息，戴上黑超的曼玉則姍姍來遲，起初她有點抗拒受訪，當陳自強接待她時，二人即時擁抱，陳自強說：「好開心Maggie從世界另一角落飛返嚟，真係好開心，大家唔好再問，我會喊o架。」曼玉隨即說：「我19、20歲時，佢教咗我好多嘢，仲叫我唔好買咁多衫，我真係收斂咗，所以今晚無論如何都要出席。」陳自強還表示曼玉在任何地方都會傳短訊給他保持聯絡。當切蛋糕時，曼玉和紅姑連同白雪仙等一同伴着陳自強。
問到陳自強的生日願望，他笑說：「我咁嘅年紀，過得一年得一年，唔知仲有幾多年可以過，所以都係希望可以保持住今日心態同想法，最緊要開心。」成龍當晚未有出現，問到他有否送禮？陳自強說：「大哥（指成龍）喺法國，吳彥祖同古仔（古天樂）都喺大陸，不過成龍已經送咗盆蘭花去我屋企。其實都唔使送乜嘢畀我，只要都係咁錫我就OK。」陳自強透露已準備紅白酒各20支，又有數十支威士忌，希望老友皆盡興而回。
0 comments:
Post a Comment