[轉載/Youtube] 網民反主為客問馮官《出位網民》吹爆 vuvuzela
選管會想管網台內容,噚日先搜查入場人士,唔畀帶政治標語進場,但由於人手不足,最終仍有多人可以入場拉 banner,甚至帶「魔鬼號角」 vuvuzela吹爆馮官。馮官平日在法庭係高高在上嘅大老爺,噚日卻面對網民車輪式炮轟,網民狂鬧指引形同「網絡 23條」,質疑官府想將扼殺言論自由嘅魔爪伸到互聯網。
馮官見眾怒難犯,立場明顯軟化,一面讚到場網民意見「十分有代表性」,又強調指引「絕對有修改空間」,最難得嘅,係馮官都承認如何界定網台「有一定困難」,表示近日「聽吓聽吓,網台條界線越來越模糊」。
難得大老爺紆尊降貴,唔少奇人異士噚日現身陳情,法律超人謝偉俊同白姐姐孖咇到場,謝偉俊問馮官,選管會建議規管嘅係咪只限於獲發牌嘅廣播機構,但馮官全程答得唔清唔楚,唔少網民發言時話:「法官大人,你答係定唔係就得嘞!」反主為客嘅場面勁爆笑。
A貨紫荊俠被叫除罩
噚日諮詢會,連人氣好旺嘅紫荊俠都現身,不過只係 A貨,由人網女主持客串,不過佢未發言,先被選管會人員要求除面罩,女俠不滿被人勒令「除罩」,一度同在場網民起哄,有男網民甚至即席除衫抗議,見到咁失控嘅場面,馮官真係冇眼睇。話時話,神出鬼沒嘅紫荊俠身份神秘,八方聽到江湖傳聞,話紫荊俠係老蕭傑作,假的真不了,到時候食糊,自有分曉。
另外,一向係「人民力量」同香港人網重點「招呼」對象嘅劉慧卿,噚日一身黃色打扮深入虎穴,喺選管會諮詢會發言。人民力量支持者喺卿姐發言時,不時大嗌「民主黨投咗共嘞,唔使再講嘢」、「劉慧卿收皮」、「民主黨出賣香港」等口號,卿姐初時都忍得住,若無其事發言。但隨住卿姐講到票站調查、保障殘疾人士投票權等問題時,人民力量支持者變本加厲,狂嗌「劉慧卿收聲」,卿姐終於忍無可忍大爆發,大鬧:「有冇搞錯,只准人哋講你哋想聽嘅嘢,呢啲叫民主?」卿姐以一敵百,寶刀未老也
0 comments:
Post a Comment